Një nga provat kryesore që lidh Orgest Bilbilin me vrasjen e Besnik Hidës në 1 Tetor 2019 në Lushnjë, është një bllok shënimesh që u gjet në banesën e tij që kishte me qira në Tiranë. Sipas gazetarit Elton Qyno , blloku i shënimeve është gjetur në 10 Prill 2020, fiks 7 muaj pas vrasjes së Hidës.
Në bllok kishte shënime me stilolaps, ku një prej tyre ishte dhe targa “AA 764 NZ”, e shoqëruar dhe me një “Benz-Mercedez”. Këto të dhëna i përkisnin makinës së Besnik Hidës, që mbeti i vrarë në verandën e një lokali nga breshëria e automatikut. Ndaj dhe sipas Prokurorisë së Fierit, kjo e dhënë ngre dyshimet se Bilbili kishte nisur që të mblidhte informacione për viktimën e tij. Autorët, për kryerjen e krimit kanë përdorur një mjet të dytë “Benz A Class”, e cila ishte në pronësi të Ardian Ahmetaj alias “Pepe”, shok i Laert Haxhiut.
Orgest Bilbili aktualisht ndodhet në burgun e Drenovës në Korçë. Ky person është dënuar me burgim të përjetshëm, në lidhje me një ngjarje të gjykuar më parë nga Gjykata e Shkallës së Parë për Korrupsionin dhe Krimin e Organizuar. Ardian Ahmetaj aktualisht ndodhet në burg, në Greqi, pasi është arrestuar në vitin 2020. Ky shtetas është dënuar në vitin 2021, me 11 vjet burgim, nga Gjykata e Athinës, për armëmbajtje pa leje në rrethana rënduese, sipas Kodit Penal të shtetit grek. Edhe Laert Haxhiu është aktualisht i arrestuar në Greqi. Ai u arrestua në Janinë, në Maj të këtij viti pritet ekstradimi i tij drejt Shqipërisë.
