Koreja e Veriut do të përfaqësohet në Lojërat Olimpike “Pyeongchang 2018”, që nisin pas 3 javësh në Korenë e Jugut, me 22 sportistë. Lajmin e ka konfirmuar Komiteti Olimpik Ndërkombëtar (IOC), që ka thënë se është arritur marrëveshja mes dy shteteve koreane, që do të parakalojnë së bashku në ceremoninë e hapjes, ashtu si në “Sidney 2000”. Është rënë dakord gjithashtu që dy Koretë të përfaqësohen me një ekip të përbashkët në disiplinën e hokejit në akull për femra.
“Falë kësaj marrëveshje i kemi dhënë një shuplakë të mirë frikës dhe forcës së armëve, duke hedhur gurin e parë të bashkëpunimit edhe më të ngushtë për të ardhmen”, tha presidenti i IOC, Thomas Bach. Ai konfirmoi se 22 sportistët koreano-veriorë do të vijnë nga disiplinat e skisë alpine dhe asaj nordike, hokejit dhe patinazhit. takimi përfundimtar mes përfaqësuesve të dy Koreve u zhvillua në Lozanë të Zvicrës.
