Prej kohësh në autostradën Tiranë-Elbasan janë bërë gara me makina, por vetëm së fundmi, policia ka arritur t’i zbulojë. Kjo është bërë e mundur, pasi të rinjtë kanë bërë thirrje në rrjetet sociale.
Mësohet se 11 persona janë shoqëruar në komisariat pasi bën thirrje për të zhvilluar gara shpejtësie në zonën e Mulletit. Blutë e Tiranës njoftojnë se ndaj tyre u vendos një masë administrative nga 15 deri në 40 mijë lekë të reja.
Njoftimi i policisë
Organizuan gara shpejtësie në Mullet dhe bënë thirrje në rrjete sociale për zhvillimin e tyre, Policia Rrugore e Tiranës ndërhyn në kohë duke parandaluar zhvillimin e këtij aktiviteti të kundërligjshëm.
Identifikohen dhe shoqërohen në Komisariat, 11 drejtues automjetesh. Shërbimet e Komisariatit të Policisë Rrugore Tiranë, në vijim të punës për ndëshkimim e të gjitha shkeljeve të qarkullimit rrugor, që bëhen rrezik potencial për përdoruesit e rrugës, pas konstatimit në rrjete sociale, të disa thirrjeve për gara shpejtësie për automjete tip “Benz”, në rrugën Tiranë-Elbasan, në Mullet, kanë organizuar punën për identifikimin dhe shoqërimin e drejtuesve të automjeteve.
Për 11 drejtuesit e automjeteve të konstatuar duke bërë gara shpejtësie u vendosën masa administrative nga 15 000 deri në 40 000 lekë të rinj, parashikuar nga neni 9, i Ligjit Nr. 8378, datë 22.07.1998, të Kodit Rrugor. Krahas masave administrative për gara shpejtësie, për tre prej tyre, u vendosën masa dhe për xhamat e zinj të errësuar.
