Një aksident tragjik ka ndodhur në Piacenza ditën e sotme, ku një automjet është përplasur me një kamioni, duke lënë të vdekur të riun shqiptar.
I njohur në komunitetin e futbollit amatorial në këtë provincë në Itali, Detar Tali Muça 26-vjeç, është ndarë nga jeta pasi automjeti me të cilën udhëtonte, u përplas me një makinë të tonazhit të lartë.
Sipas policisë, përplasje e aksidentit ka qenë tepër e dhunshme, deri në atë masë sa e gjithë pjesa e përparme e mjetit të tij ka përfunduar e ngecur në pjesën e pasme të kamionit dhe shoferi ka mbetur i bllokuar në lëmshin e llamarinës.
Nga mediat italiane thuhet se zjarrfikësit e Piacenzës kanë punuar për një kohë të gjatë me pincë dhe gërshërë hidraulike për të liruar 26-vjeçarin.
Menjëherë pas nxjerrjes nga mjeti, Muça është dërguar me urgjencë në spital, ku ka marrë edhe ndihmën mjekësore, por për shkak të plagëve të rënda ka ndërruar jetë.
Mesfushori i cili kishte luajtur me skuadra të ndryshme në kategoritë amatorë të futbollit italian, së fundmi me Sale, Muça ishte një shofer në punën e përditshme për një kompani në Tortona.
“Një lajm që na ka trishtuar shumë. Kemi mbetur pa fjalë të gjithë”, tha për mediat italiane drejtori sportiv i Sale, Alberto Del Konte.
Futbollisti shqiptar luante për këtë skuadër prej tre vitesh, ndërsa më parë kishte luajtur edhe për Derthona, San Xhiuliano Nuovo, Garbanja apo Audaks Orione S. Bernardino. Të gjithë këto klube e kujtuan sot me mesazhe në rrjetet sociale.
