Bashkimi Europian nuk është naiv në lidhje me afrimin diplomatik midis Rusisë dhe Kinës në sfondin e luftës në Ukrainë, tha të mërkurën presidenti i Këshillit Europian Charles Michel.
Por, vuri në dukje ai, marrëdhënia gjithnjë e më e ngushtë nuk duhet ta pengojë Brukselin nga angazhimi me Pekinin.
“Ne jemi absolutisht të bindur se është e rëndësishme që Kina të mos e mbështesë Rusinë,” tha Michel.
“Është e rëndësishme që Kina të mbështesë ligjin ndërkombëtar, stabilitetin përmes Kartës së OKB-së. Unë nuk jam naiv. E di se ka lidhje të ngushta midis Kinës dhe Rusisë,” vazhdoi ai.
“Por nga ana tjetër, mendoj se në ato rrethana, është shumë e qartë se ne duhet të angazhohemi me Kinën, jo sepse jemi dakord për gjithçka me Kinën, përkundrazi, por sepse duhet të mbrojmë interesat tona dhe të mbrojmë parimet tona”.
Në intervistën e tij me Euroneës, Michel ripohoi mbështetjen e tij për planin e paqes prej 10 pikash të propozuar nga presidenti ukrainas Volodymyr Zelenskyy, i cili bën thirrje për tërheqjen totale të trupave ruse dhe rivendosjen e kufijve të Ukrainës të njohur ndërkombëtarisht.
Propozimi i Zelenskyy qëndron në kontrast të plotë me dokumentin 12-pikësh të paraqitur së fundmi nga Kina. Plani kinez i referohet parimeve të së drejtës ndërkombëtare, por shmang përshkrimin e luftës si një luftë ose pushtim, në vend të kësaj duke folur për një “krizë”.
Ai gjithashtu kërkon heqjen e “sanksioneve të njëanshme” dhe fundin e “mentalitetit të Luftës së Ftohtë”, gjuhë që shihet si kritikë ndaj aleatëve perëndimorë.
“Ky plan paqeje nuk është ai në të cilin ne besojmë,” tha Michel.
“Ne besojmë në planin e paqes të propozuar nga Presidenti Zelensky, e cila bazohet në kartën e OKB-së, ligjin ndërkombëtar dhe qasjen shumëpalëshe”.
