Policia dyshon se grupi i të shumëkërkuarit nga drejtësia, Ervis Martinaj, mund të jetë riaktivizuar dhe mund të jetë përgjegjës për atentatin me armë zjarri në lokalin e Fatjon Muratit në lagjen “Don Bosko” të Tiranës.
Sipas gazetares Klodiana Lala, policia është duke verifikuar disa persona që konsiderohen si njohje shumë të afërta të Martinajt. Ajo tha në emisionin “Opinion” se policia nuk përjashton as mundësinë e “një grupi të tretë”.
Fatjon Murati është mik i ngushtë i Endrit Dokles, i përfolur si një prej armiqve të Martinajt. Murati gjithashtu është dyshuar për pjesëmarrjen në atentatin ku mbeti i vrarë kushëriri i Ervis Martinajt, Brilant Martinaj.
“Disa persona që janë konsideruar njohje shumë të afërta të Ervis Martinajt, nuk mund ta them nëse është gjallë apo jo, por policia dyshon se grupi i Ervis Martinajt mund të jetë riaktivizuar. Nuk përjashtohet mundësia të jetë një grup i tretë. Por jemi para faktit që sot drejtësia shqiptare duhet të japë llogari. Banesa e tij luksoze ishte vetëm 30 hapa nga lokali, banonte në një vilë katër katëshe e rrethuar nga një mur dhe një derë e blinduar. Aty rrinte dhe gjithë fisi i Fatjon Muratajt”, deklaroi gazetarja Lala.
