Në fillim të kësaj jave që po mbyllim, u bë edhe seanca e parë parlamentare e këtij viti.
Siç e kemi ndjekur, edhe nga ekrani, seanca ishte mjaft e tensionuar dhe me debate të ashpra nga ana e deputetëve të opozitës, PD dhe LSI, ndaj deputetëve të PS-së dhe drejtuesve të qeverisë.
Opozita kishte dërguar në Parlament një kërkesë, ku propozonte ndryshime kushtetuese për zgjedhjen e Kryeprokurorit të Përgjithshëm të Përkohshëm, e cila u refuzua nga maxhoranca.
Kjo solli debate të forta në sallë, ku, më pas, opozitarët e lanë sallën dhe ikën.
Mirëpo, konfliktet dhe mosdakordësitë, mesa duket, nuk janë vetëm mes pozitës dhe opozitës, por edhe brenda llojit.
Ajo që pamë ne në dalje të Parlamentit, moment që u fotografua edhe nga paparazzi ynë, ishte fakti se kryetari i PD-së, Lulzim Basha, dhe ish-Kryeministri Berisha u sollën ftohtë me njëri-tjetrin, gati në mospërfillje totale.
Berisha nuk i ka kursyer kritikat për pasardhësin e tij, sidomos për mënyrën se si ai bëri fushatën e zgjedhjeve të qershorit dhe listat e deputetëve që solli, duke nxjerrë jashtë loje, të vjetrit e kësaj partie.
