Një tërmet me magnitudë 4.7 ballë i shkallës rihter me epiqendër në Klos ka tronditur ditën e djeshme vendin tonë teksa lëkundjet janë ndjerë të fuqishme edhe në Tiranë, Durrës dhe Elbasan.
Sipas Ministrisë së Mbrojtjes u raportua për disa dëme të lehta në Xibër, Klos dhe fatmirësisht nuk ka të lënduar në njerëz. Lëkundjet e mbrëmshme janë pasuar nga pasgoditje deri në orët e para të mëngjesit.
Specialisti në fushën e sizmologjisë, Rrapo Ormeni tha ditën e sotme, në një prononcim për mediat se goditja e djeshme është shoqëruar nga 70 pasgoditje, çka tregon sipas tij se nuk priten lëkundje më të forta.
Ormeni tregon se janë tre zona më aktive në Shqipëri të rrezikuara nga tërmetet.
“Zona e bregdetit Adriatik, zona Lushnje-Elbasan-Dibër dhe Korçë-Ohër, këto janë zonat më aktive”, tha eksperti.
