Për gazetarin Elkier Bushkolaj, fakti që Forcat e Ndërhyrjes së Shpejtë (FNSH), kryen kontroll në banesën e të shumëkërkuarit, Ervis Martinaj përforcon dyshimet se ky i fundit është gjallë.
Bushkolaj u shpreh se nëse do të kërkohej kufoma e Martinajt, policia nuk do të kryente kontrolle në banesën e tij.
“Unë hyj te ata gazetarë që mendoj se Ervis Martinaj është i gjallë, gjithsesi janë të hapura të treja pistat. Por fakti që sot policia bëri kontrolle në banesën e tij, i përforcon edhe më shumë këto dyshime, që është gjallë. Nëse do të kërkonte një kufomë, ka informacion ose ka indicie. Këto lloj operacionesh, përgjithësisht, në prag festash siç janë Krishtlindjet, apo Viti i Ri apo festa e Bajramit, janë operacione të zakonshme.
Janë zhvilluar disa operacione të tilla në veri të vendit, kryesisht në zonën e Mirditës, Lezhës, Kurbinit, por edhe në Tropojë, pasi për raste festash edhe personat që janë në kërkim, mendojnë që nga ana e policisë ka një mungesë vigjilence, por e njëjta gjë ndodh edhe nga ana e policisë, që personat që janë në kërkim kanë mungesë vigjilence dhe takohen me bashkëpunëtorët e tyre”, theksoi ai.
