Një barrikadë e re është shtuar në lagjen Berxhane, në rrugën që të çon drejt Zveçanit, e cila pengon qarkullimin e lirë të automjeteve.
Ministri i Punëve të Brendshme, Xhelal Sveçla, është shprehur se i kanë kapacitet për të hequr barrikadat e vendosuri në veri, teksa shtoi se po bëjnë një vlerësim të situatës në koordinim me partnerët ndërkombëtar, njofton Klan Kosova.
“Gjatë natës ka vazhduar vendosja edhe e një barrikade të re, në lagjen Berxhane që shpie për në Zveçan, për të vazhduar pengimin e lirisë së lëvizjes së lirë edhe në rrugët alternative, e që po vështirëson edhe më tej jetën e qytetarëve në veri të vendit. Policia e Kosovës, sipas mandatit të saj ligjor e kushtetues po angazhohet në ofrimin e sigurisë ndaj të gjithë qytetarëve dhe vendit”, thuhet në komunikatën e policisë.
Sindikata e Policisë së Kosovës ka bërë të ditur se policët janë bllokuar nga barrikadat në Leposaviç dhe Jarinjë.
Ata kanë kërkuar që të ndërhyhet menjëherë nga organet e vendit dhe ato ndërkombëtare.
“Sindikata e Policisë dhe të gjithë pjesëtarët e policisë janë duke i përcjellur nga afër këto zhvillime si dhe janë shumë të shqetësuar për fatin e kolegëve të bllokuar, prandaj u bëjmë thirrje urgjente Presidencës, Qeverisë, KFOR-it, EULEX-it dhe ambasadave të QUINT-it që të bashkërendojnë veprimet dhe menjëherë të krijohen kushtet për lëvizje të lirë dhe zyrtarëve policor t’ju bëhet ndërrimi.
Zyrtarët policor në këto dy lokacione të bllokuara po qëndrojnë me moral shumë të lartë, por shëndeti dhe jeta e tyre është e rrezikuar seriozisht për shkak të kushteve të vështira të krijuara nga rrethanat dhe ambienti në të cilin qëndrojnë. Duhet të kuptojmë se edhe durimi e ka fundin e vet edhe për ata që janë atje edhe për ne. Në këtë rast është tejkaluar gjithçka nga normalja sepse kemi të bëjmë me rrezikun e jetës nga sëmundje të ndryshme të zyrtarëve policorë dhe qytetarëve që banojnë në atë pjesë, tani më kemi të bëjmë me krizë humanitare, prandaj duhet të intervenohet urgjentisht”, thuhet në një kumtesë nga Sindikata e Policisë së Kosovës.
