Gjyqtarja Mimoza Margjeka, u dënua nga GJKKO këtë të enjte me 4 vite e 6 muaj burg nën akuzën për korrupsion, dënim që pritet të konvertohet në shërbim prove
Bashkëshorti i saj Arben Cara është dënuar me 4 vite burg, avokati Skënder Demiraj me 3 vite shërbim prove, Klaudio Zhilla me 3 vite burg.
Në një reagim pas vendimit të dhënë, ish-gjyqtarja e Durrësit e drejtoi gishtin drejt kryeministrit Rama, kur tha se vendimi ndaj saj ishte i porositur prej maxhorancës në pushtet.
Margjeka nënvizoi se ajo u dënua pasi dha në vitin 2019 vendimin që nuk njihte zgjedhjet lokale me 1 kandidat në bashkinë e Durrësit.
“Vendimi që dhashë unë më 17 korrik, e dha në 19 korrik gjyqtari tjetër me kërkesë të Edi Ramës. Pse s’e hapni dosjen.
Të shqetësosh lartmadhërinë nuk ka lidhje. Unë e di ligjin, e di që këta njerëz sot kanë qenë të porositur. E ngrite zërin do dënohesh. Do ta përballoj do punoj një profesion tjetër
Ajo shtoi: “Kush ka punuar me mua e di një gjë që është e drejtë unë e bëj dhe i shkoj deri në fund. Unë për atë punë isha aty. Nuk mund t’i thuash futu ti në zgjedhje dikujt që nuk është parti. Çudi do të më dukej të mos më dënonin, a ju kujtohet deklarata për zgjedhjet e bashkisë, keqardhje për gjyqtaren që humbi rrugën, nuk do ta njohim vendimin, tha qeveria.
Në këtë botë rrotullohen gjërat, gjërat do shkojnë në vendin e vetë, por do kohën e saj”.
Kujtojmë se gjykata dënoi gjithashtu bashkëshortin e saj, shtetasin Arben Cara, me 4 vite burg, avokatin Skënder Demiraj me 3 vite shërbim prove dhe Klaudio Zhilla me 3 vite burg.
