Një sasi vere është sekuestruar në Portin e Vlorës pasi ishte futur në vendin tonë pa paguar akcizë.
Policia bën me dije se nga kontrollet në Port është kaluar për kontroll të imtësishëm në vijë të dytë autobusi që drejtohej nga një person me iniciale A.J.
Gjatë kontrollit janë gjetur dhe sekuestruar kuti me shishe vere, pa faturë blerjeje. Ndaj drejtuesit të autobusit ka nisur hetim në gjendje të lirë ndërkohë që materialet i kaluan Prokurorisë për veprime të mëtejshme.
“Kontrolle intensive nga shërbimet e Policisë Kufitare në Portin e Vlorës, në bashkëpunim me Seksionin e Hetimit të Krimit Ekonomik dhe Financiar të DVP Vlorë dhe autoritetet doganore në këtë port, për parandalimin, evidentimin dhe goditjen e krimeve ndërkufitare.
Goditet një tjetër rast i kontrabandës me mallra për të cilat paguhet akcizë. Sekuestrohet një sasi vere, procedohet drejtuesi i automjetit që tentoi të fuste kontrabandë, në vendin tonë.
Shërbimet e PKK Port Vlorë, në bashkëpunim me specialistët e Seksionit për Hetimin e Krimit Ekonomik dhe Financiar të DVP Vlorë dhe autoritetet doganore në këtë port, në vijim të kontrolleve për goditjen e paligjshmërisë, bazuar në analizën e riskut dhe në kontrollet me përzgjedhje, në hyrje të RSH-së, kanë kaluar në vijën e dytë, për kontroll më të imtësishëm, autobusin me drejtues shtetasin A. J.
Gjatë kontrollit të ushtruar në këtë autobus, shërbimet e Policisë gjetën dhe sekuestruan kuti me shishe vere, pa faturë blerjeje.
Në përfundim të veprimeve, specialistët e Seksionit për Hetimin e Krimit Ekonomik e Financiar të DVP Vlorë referuan materialet në Prokurori dhe nisi procedimi penal për shtetasin A. J., 52 vjeç, banues në Vlorë, për veprën penale “Kontrabanda me mallra për të cilat paguhet akcizë”. Materialet i kaluan Prokurorisë, për veprime të mëtejshme”, njofton policia.
