Disa pamje të rënda janë bërë virale një ditë më parë në rrjet, teksa shihet se një efektiv i policës dhunon një shofer në Pogradec.
Sipas konfirmimit të autoriteteve punonjësi i policie pasi është identifikuar është përjashtuar nga Policia e Shtetit.
Bëhet me dije se efektivi i ‘Rrugores’ në Pogradec, inspektori i identifikuar si A.S., është përjashtuar për tejkalim të kompetencave që i jep ligji.
Në disa pamje që qarkullojnë në rrjet shfaqet duke debatuar me një drejtues mjeti, ndërsa ky i fundit e shtyn efektivin.
Si kundërpërgjigje, polici e qëllon me shpulla dhe grushte. Ngjarja ka ndodhur ditën e djeshme rreth orës 15:00 në lagjen nr. 3, Pogradec.
Për inspektorin ka nisur edhe hetimi penal nga Prokuroria pranë Gjykatës së Rrethit Gjyqësor Pogradec.
Gjithashtu, është vendosur transferimi në një strukturë tjetër policore, për punonjësin tjetër të Policisë, shtetasin L. H., i cili nuk ka ndërhyrë për të parandaluar veprimin e paligjshëm të kolegut të tij.
Që me ardhjen në krye të policisë së shtetit të Muhamet Rrumbullakut, efektivi i Rrugores së Pogradecit është i katërti që përjashtohet nga strukturat e forcave blu.
