Një 32-vjeçar, cili përplasi për vdekje me makinë ish-kunatin e tij në Ishull-Lezhë, rrezikon dënimin me 35-vite burg.Kjo masë dënimi është kërkuar nga Prokuroria e Lezhës për Albert Kacën, e cila dha në Gjykatë konkluzionet përfundimtare në lidhje me këtë çështje.
Ai akuzohet për veprën penale “Vrasje e kryer brenda rrethit familjar” dhe sipas organit të akuzës është arritur të provohet se i pandehuri e ka goditur me dashje për vdekje me makinë ish-kunatin e tij, Ylli Mena.
Tashmë do të jetë trupa gjykuese, e cila do të japë vendimin përfundimtar për 32-vjeçarin Albert Kaca, i cili vijon të jetë në arrati, pasi pas ngjarjes arriti të largohet dhe nuk është arritur të prangoset nga Policia.
VRASJA ME MAKINË
Ylli Mena u aksidentua me dashje për vdekje me makinë mëngjesin e 21 shtatorit të vitit 2019, teksa po lëvizte në këmbë në IshullLezhë. Pas përplasjes nga makina, Ylli Mena ndërroi jetë në spital, ndërsa autori është shpallur në kërkim policor dhe po punohet për kapjen e tij.
Për këtë ngjarje është marrë i pandehur ish-kunati i viktimës, Albert Kaca, ndaj të cilit është ngritur akuza “Vrasjes së kryer brenda rrethit familjar”, vepër kjo që parashikon një dënim nga 35 vite burgim deri në burgim të përjetshëm.
Autori i dyshuar vijon të jetë në arrati dhe po gjykohet në mungesë, ndërsa divorci i viktimës me motrën e autorit është bërë shkak i krimit të rëndë.
DIVORCI
Viktima, 27-vjeçari Ylli Mena, ishte martuar për disa vite me motrën e autorit të dyshuar të krimit, i cili vazhdon të jetë ende në kërkim nga Policia. Nga hetimet, Policia zbuloi se 27- vjeçari u përplas qëllimisht nga ish-kunati i tij, teksa udhëtonte me biçikletë në Ishull-Lezhë.
Ai gjeti vdekjen disa orë pas aksidentit në Spitalin e Traumës në Tiranë, pasi nuk mundi t’u mbijetonte plagëve të marra. Viktima ishte martuar me motrën e autorit, me të cilën kishin tre fëmijë, por rreth tre muaj pas ngjarjes së rëndë, ata ishin ndarë, duke sjellë edhe konflikt mes palëve.
