Këtë të shtunë hakerat e sponsorizuar nga Irani kanë vënë në shënjestër sistemin TIMS që shërben për regjistrimin e hyrje-daljeve në pikat kufitare shqiptare.
Mësohet se sulmi ka ndodhur në sistemin e aeroportit të Rinasit, ndërsa të dhënat e para tregojnë se ka pasur rrjedhje të dhënash nga sistemi TIMS. Ndërkohë, në kompjuterët të cilët kanë qenë funksionalë gjatë momentit të sulmit është shfaqur një logo, e ngjashme me të 15 korrikut.
Menjëherë më pas u ndoq protokolli i fikjes të sistemit në mënyrë për mos t’i dhënë mundësi avancimi hakerave, në marrjen nën kontroll të këtij sistemi, më i rëndësishmi për policinë shqiptare.
Kalimi në të gjitha pikat kufitare u bë në mënyrë manuale për t’u kthyer pas 24 orësh. Udhëtarët në aeroporte u njoftuan të shkonin 2 orë përpara fluturimeve për shkak të vonesave.
Rikthimi në normalitet i sistemit u bë dhe në pikat kufitare të Kapshticës, Kakavijës, Hanit të Hotit, Muriqanit dhe Morinës. Edhe në portin e Durrësit dhe atë të Vlorës.
Hetimet e mëtejshme do të zbulojnë se çfarë dëmi ka shkaktuar ky sulm, por autoritetet thonë se TIMS dhe sisteme të tjera, kanë pasur masa mbrojtëse, pasi në brendësi të tyre kanë informacione tejet sekrete.
Kjo temë u diskutua ditën e sotme në emisionin “Shqipëria Live” në Top Channel, ku pati edhe një debat të fortë mes të ftuarve.
Në një moment avokati i njohur, Spartak Ngjela, u shpreh se ky hakërim nuk ka bërë asgjë të keqe, nuk ka bërë dëme.
“Bankat tregohen të sigurta, qeveria ashtu. Kjo do të thotë ne jemi pro perëndimor”, tha Ngjela, i cili më pas përmendi edhe “radikalizmin mysliman”.
Pikërisht në këto momente ka reaguar Kreshnik Osmani, ekspert për çështje ndërkombëtare, i cili nuk ishte dakord me fjalët e avokatit.
Pjesë nga debati:
Ngjela: Po dëgjoni të çmendurit
Osmani: Ke pasojat e burgut, je një radikal. Nuk të lejojmë të fusësh çarje ndërfetare
Ngjela: Unë thashë e kemi në favor radikalizmin. Por këta janë anti perëndimor
Osmani: Ti je një palaço, kllon.
Ngjela: Pusho, pusho
Osmani: Nuk më thua mua pusho. Irani nuk ka thënë se po mbani muhaxhedinët do të hakmerrem. Irani kur thotë më keni shpallur luftë me muhaxhedinët, nuk e ka problem të thotë se do shpallë luftë. Ose shkojmë në gjykatë, ose mund t’i thuash unë kam kërkesë. Ose t’i thotë në mënyrë më të qytetëruar për t’i larguar.
