Një anije është mbytur në rajonin verior të Brazilit.
Bëhet me dije nga mediat e huaja se anija ishte duke transportuar dhjetëra njerëz. Si pasojë e kësaj ngjarje të rëndë konfirmohet se kanë humbur jetën 11 persona, ndërsa të tjerë raportohen të humbur, thanë zyrtarët.
Mësohet se anija ishte nisur nga ishulli Marajo në shtetin verior të Para dhe po shkonte për në kryeqytetin e shtetit të Belem, tha Marina braziliane në një deklaratë.
Ndërkohë, Sekretari i Sigurisë Publike dhe Mbrojtjes Sociale i shtetit tha se 63 persona ishin shpëtuar dhe 11 trupa ishin gjetur, dhe se po vazhdon kërkimi për gjetjen e njerëzve të tjerë që mendohet se ishin në bord.
Shërbimi zjarrëfikës gjatë një deklarate bëri me dije se skafi nuk kishte autorizim për të transportuar pasagjerë në rrugën ujore ndërqytetare dhe se ishte nisur nga një port i paligjshëm. Ndërkohë, policia civile e Brazilit ka nisur hetimet për të zbuluar shkaqet e aksidentit.
