Parandalohet një ngjarje e mundshme kriminale në një familje në Tiranë.
Efektivët e Komisariatit të Policisë Nr. 6, në operacionin e koduar “Ndërhyrja”, arrestuan një 57-vjeçar që ushtroi dhunë ndaj bashkëshortes dhe e kanosi atë me armë gjahu.
Gjatë ndërhyrjes, 57-vjeçari ka kanosur edhe punonjësit e Policisë, me armën e gjahut.
“Shërbimet e Komisariatit të Policisë Nr. 6, pas njoftimit se në rrugën “Sabaudin Gabrani”, një shtetas po ushtronte dhunë ndaj bashkëshortes së tij, të cilën e kishte kërcënuar me armë gjahu, menjëherë kanë organizuar punën dhe kanë finalizuar operacionin policor të koduar “Ndërhyrja”.
Si rezultat i operacionit u bë kapja dhe arrestimi në flagrancë i shtetasit:
– S. D., 57 vjeç, për veprat penale “Dhuna në familje”, “Kanosja për shkak të detyrës” dhe “Mosbindja ndaj urdhrit të punonjësit të policisë së rendit publik”.
Mbrëmjen e djeshme, shtetasi S. D. ka ushtruar dhunë ndaj bashkëshortes së tij dhe e ka kanosur atë me armë gjahu (çifte). Në momentin që kanë mbërritur shërbimet e Policisë, ky shtetas, ka kanosur me çifte, për shkak të detyrës, edhe punonjësit e Policisë. Pas neutralizimit të tij, 57-vjeçari nuk i është bindur urdhrave të punonjësve të Policisë, për t’u shoqëruar në komisariat”, ben me dije policia.
Në cilësinë e provës materiale u sekuestrua arma e gjahut (çifte).
Materialet i kaluan Prokurorisë, për veprime të mëtejshme.
