Një atentat i mundshëm është parandaluar ditën e sotme pas ndërhyrjes së policisë në zonën e Kunës në afërsi të Shëngjinit.
Në pranga policia vendosi 28-vjeçarin Nikoll Shernikun, i cili më parë ka qenë i dyshuar si person i përfshirë në vrasjen e efektivit Xhuljo Prela në 2021, e poashtu dhe Flutura Berisha, e cila ndodhej me 28-vjeçarin në momentin e arrestimit.
Paraprakisht dyshohet se atentati i parandaluar sot ishte një krim për hakmarrje, që lidhet me atentatin e ndodhur disa javë më parë në Fushë Krujë, ku mbetën të vrarë Brilan Martinaj, Diklen Vata dhe Besmir Hoxha.
Shënjestër e atij atentati ishte pikërisht Martinaj, i cili bën lidhjen mes dy ngjarjeve, pasi ai ka qenë autori i dyshuar për vrasjen e efektivit Prela.
26-vjeçari Xhulio Prela u vra në datën 5 dhjetor në superstradën Lezhë-Laç në afërsi të fshatit Gajush. Nga hetimet për vrasjen e efektivit, janë gjetur dy armë të cilat pas ekspertizës së bërë rezultoi se ishin të përdorura në vrasjen e tij. Arma tip kallashnikov u përdor nga autorët për të qëlluar drejt kamerave të sigurisë të një karburanti që kishin filmuar vrasjen e efektivit, ndërsa arma tjetër tip pistolet TT pas ekspertizës balistike u provua që ishte arma që i mori jetën efektivit të FNSH.
Konflikti i dy viteve më parë i autorëve me Xhulio Prelën dyshohet se nisi pas një sherri për dritat e gjata të makinës, pasi Prela, i cili po kthehej nga fshati Kosmaç i Shkodrës ndaloi teksa autorët i sinjalizuan me drita dhe elektrik dore. Duke menduar se ata mund të kishin nevojë për ndihmë, Prela ndaloi por u përball me plumbat nga një pistoletë TT e autorëve. Prokuroria tha se nga analiza e qelizave telefonike, ishte provuar se në vendngjarje ndodhej edhe Brilant Martinaj.
Që prej dhjetorit të vitit 2020 Redion Hysa dhe Sokol Hysa u futën në burg, pasi kushërinjtë ishin ata të cilët qëlluan kamerat e sigurisë. Ndërkohë Nikoll Sherniku u lirua pak kohë më parë për mungesë provash. Më pas Nikoll Sherniku u la në arrest shtëpie nga Gjykata e Lezhës së bashku me Sokol Hysën, ndërsa Redion Hysa vijon të jetë në burg.
Duket se këto ngjarje janë të lidhura me njëra tjetrën dhe po përgatitej një hakmarrje. Megjithatë pritet që policia pas hetimeve të sqarojë plotësisht se kush ishte shënjestra e radhës për tu eliminuar.
