Kryetari i grupit parlamentar të PD, Enkelejd Alibeaj së bashku me disa deputetë demokratë ka marrë pjesë në një takim me qytetarët në Elbasan për sa i përket Reformës Territoriale.
Alibeaj me anë të një postimi në Facebook ka shprehur shqetësimin në lidhje me disa problematika si mungesa e shërbimit ndaj qytetarëve dhe diskriminimi i zonave periferike e rurale që sipas tij janë pasojë e vendimmarrjes së qeverisë në vitet e kaluara.
Ai u shpreh se fenomene si paratë e qytetarëve që shkojnë për tendera korruptivë për banda kriminale apo investimet e pakta në infrastrukturë për banorët e zonave rurale janë pjesë e bilancit dëshpërues të “Reformës territoriale-elektorale” të vitit 2014.
foto galeri foto galeri foto galeri 123PreviousNext
DEKLARATA
Me qytetarë, grupe interesi dhe përfaqësues politikë në qarkun e Elbasanit, për të diskutuar për qëndrimin tonë mbi Reformën Administrative-Territoriale.
Mungesa e shërbimit ndaj qytetarëve, diskriminimi i zonave periferike dhe rurale, shndërrimi i bashkive në agjenci punësimi elektoral, paratë e qytetarëve që shkojnë për tendera korruptivë për bandën kriminale lokale apo oligarkun e radhës të lidhur me pushtetin e Tiranës, biznesi i vogël i kërrusur nga taksa e tarifa pa fund, në qepenat e mbyllur të të cilëve vendoset lajmërimi mortor “jepet me qera”, prodhimi bio bujqësor i sfiduar keqas nga ai importit, banorë të fshatrave që taksohen për gjelbërim (!), e që iu duhen kilometra të tëra për të marrë një shërbim elementar në qytet, infrastruktura rurale që prej vitesh nuk njeh asnjë investim, lidhjet historike dhe tradicionale të goditura nga bashkimet artificiale të territoreve, e mbi të gjitha përralla e bukur e 2014 për “administrimin vetëqeverisës” dhe “demokraci lokale” është kthyer në makth dhe barrë torturuese për njerëzit. Ky është bilanci dëshpërues i “Reformës territoriale-elektorale” të 2014.
Për qytetarët e lënë në harresë të Librazhdit, Prrenjasit, Gramshit, Peqinit, Belshit, Cërrikut, Elbasanit, kërkohen ndryshime që të jenë funksionale, të tejkalojnë interesat politike, të ruajnë identitetin, traditën, historinë, ndjesinë e brendshme të lidhjeve komunitare, dhe të ringjallin koshiencën e humbur të të qeverisurit nga vetë njerëzit!
Së bashku me kolegët Dhurata Çupi, Andia Ulliri, Zheni Gjergji e Lefter Gështenja, në Komision e pastaj në Kuvend, do përcjellim e mbështesim një reformë që vjen nga qytetarët e iu shërben qytetarëve!
