Shpërthimet e vazhdueshme në fabrikën e prodhimit të bombolave të vogla janë kthyer në një shqetësim serioz për banorët e Porto Romanos në Durrës.
Diten e djeshme, banorët thonë se ka pasur shpërthime të tjera që kanë shkaktuar panik në zonë. Sot, një përfaqësi e banorëve iu drejtuan institucioneve për të gjetur një zgjidhje për largimin e depozitave nga zona.
Banorët thonë se i janë drejtuar prefekturës dhe bashkisë së qytetit, por që janë injoruar nga drejtuesit. Banorët kërkojnë të merren masa dhe të shmanget një tragjedi e mundshme, pasi siç shprehen ata, nëse ndodh përsëri një incident si ai i disa ditëve më parë, e gjithë zona do të shuhet nga shpërthimi. Kërkesa e vetme e tyre është që firma që ka instaluar depozitat e gazit, të largohet nga ai vend.
Dy javë më parë në këtë vend shpërtheu një zjarr gjatë procesit për mbushjen e bombolave të gazit të përmasave të ndryshme. Zjarri u vu shumë shpejt nën kontroll, duke shmangur një katastrofë të mundshme. Për shuarjen e zjarrit kanë ndihmuar edhe automjetet e stacionit zjarrfikës të qytetit, ndërkohë që këta të fundit kanë ndëshkuar fiirmën “Power Gas” me masë administrative.
