Policia e Tiranës ka vënë në pranga tetë shtetas në 24 orët e fundit, për vepra të ndryshme penale. Mes tyre, në Kamzë, uniformat blu kanë pikasur një person duke tentuar të vjedhë një banesë.
Nga verifikimet e kryera ka rezultuar se autori, shtetasi me inicialet M. D., edhe pak ditë më parë, ka vjedhur një shumë parash dhe një aparat celular, në të njëjtën banesë.
“Specialistët për Hetimin e Krimeve në Komisariatin e Policisë Nr. 1 ndaluan me iniciativë shtetasin M. D., 42 vjeç, banues në Kamzë, pasi është kapur nga shërbimet e Policisë, duke tentuar të vjedhë në banesën e shtetasit P. M. Nga verifikimet e kryera ka rezultuar se shtetasi M. D., më datë 12.06.2022, ka vjedhur një shumë parash dhe një aparat celular, në banesën e shtetasit P. M”, bën me dije policia.
Sakaq, efektivët në Komisariatin e Policisë Kavajë arrestuan në flagrancë shtetasin J. K., 31 vjeç, banues në Kavajë, për veprat penale “Plagosja e rëndë me dashje” dhe “Prodhimi, mbajtja, blerja, apo shitja pa leje e armëve të ftohta”.
Shtetasi J. K., gjatë një konflikti për motive të dobëta, ka goditur me mjet prerës shtetasin L. Ç., i cili si pasojë është dëmtuar dhe ndodhet në spital, jashtë rrezikut për jetën.
Specialistët e Seksionit për Hetimin e Narkotikëve arrestuan në flagrancë shtetasin R. K., 28 vjeç, banues në Kombinat, pasi gjatë kontrollit fizik të tij, nga shërbimet e Policisë, iu gjet dhe iu sekuestrua, në cilësinë e provës materiale, një sasi lënde e dyshuar narkotike, e llojit kokainë.
Specialistët për Hetimin e Krimeve në Komisariatin e Policisë Nr. 2 bënë kapjen e shtetasit në kërkim L. K., 45 vjeç, pasi Gjykata e Shkallës së Parë Tiranë e ka dënuar me 3 muaj burgim, për veprën penale “Plagosja e lehtë me dashje”.
Specialistët e Qarkullimit Rrugor arrestuan në flagrancë shtetasit:
-D. V., 45 vjeç, S. H., 40 vjeç dhe F. Sh., 60 vjeç, të tre banues në Tiranë, pasi u kapën duke drejtuar mjetet përkatëse, në gjendje të dehur;
-A. H., 67 vjeç, banues në Tiranë, pasi duke drejtuar mjetin e tij, ka aksidentuar këmbësorin K. M., 79 vjeç, i cili si pasojë është dëmtuar dhe ndodhet në spital, nën kujdesin e mjekëve.
Materialet i kaluan Prokurorisë, për veprime të mëtejshme
