Pesë muaj përpara provimeve të qershorit, Ministria e Arsimit ka publikuar temat kryesore mbi të cilat do të hartohen testet e provimeve me detyrim e me zgjedhje.
Çdo maturant që do t’i nënshtrohet provimeve mund të përcaktojë që tani, mbi bazën e programeve orientuese, lëndët fakultative nga 39 programe gjithsej për provimet me detyrim e me zgjedhje.
Rezultatet e këtyre të fundit së bashku me kriteret shtesë dhe formulën që vendos çdo fakultet, përcaktojnë fituesit. Kështu, maturantët kandidatë për në universitete kanë mjaftueshëm kohë të studiojnë deri në muajin qershor kur zhvillohet zakonisht sezoni i provimeve që përcakton nëse ata do të sigurojnë apo jo një vend në universitet.
Struktura e tezave do të jetë e njëjtë me atë të viteve të kaluara. Sakaq, që më 29 dhjetor të 2017-ës, Ministria e Arsimit ka bërë publike dhe rregulloren e maturës, e cila përcakton ecurinë dhe afatet e plotësimit të formularëve.
Kështu, brenda dhjetëditëshit të parë të muajit mars, maturantët do të kenë në dorë formularët A1 dhe A1Z bashkë me udhëzuesit për plotësimin e tyre.
Ndërsa aplikimi, ashtu si një vit më parë, do të bëhet në gjysmën e dytë të muajit. Ai nis online ne portalin qeveritar e-albania për t’u formësuar më pas në atë të Maturës Shtetërore, sipas një plani kalendar, që do të shpallë Qendra e Shërbimeve Arsimore.
