Mbrëmjen e së dielës duke u gdhirë e hëna kulmuan ditët e pelegrinazhit 13- javor në kishën e Shna Ndout në Laç.
Me mijëra pelegrinë, nga e gjithë Shqipëria, por edhe jashtë saj, nisën rrugën e pelegrinazhit që prej orëve të para të mëngjesit të 12 qershorit, për të kaluar natën në këtë vend të shenjtë, në përpjekje për të imituar Shna Ndoun, që sipas tyre, ka kaluar në vargmalin e Kurbinit.
Të krishterë e myslimanë thonë se ky vend ka bërë mrekulli të shumta, ndaj dhe besojnë te kisha e Laçit.
“Kam ardhur nga Shkodra, kemi besim te kisha e Laçit. Kam besim! Lutem për fëmijët t’i kem mirë. Vij shpeshherë. Kam dëgjuar se ka bërë mrekulli të shumta, ndaj dhe vij këtu. Bashkë me burrin do ta kaloj gjithë natën këtu te kisha, sepse është një feste e madhe, nata e ‘Shna Ndout’”, thotë një besimtare.
Ndërsa një tjetër besimtar mysliman tregon se kisha e Shna Ndout ka bërë mrekulli për djalin e tij, i cili sapo ka ardhur në këtë vend të shenjtë, i ka ardhur goja.
“Jam nga Tirana, kisha qejf për të ardhur. Vetë jam i sektit mysliman, por e kam qejf të vij, nga të gjitha fetë kam qejf të marrë mirësitë e veta. Do të rri deri në orën 12. Kam besim, sepse djali i madh, i jemi ka mbaruar shkollën e lartë dhe master. Kur ka qenë i vogël, nuk ka pas fol e sa erdhi këtu, i erdhi goja. Vij shpesh. Me intereson besimi në Zot dhe lutem që të jemi mirë familjarisht dhe të gjithë shqiptarët”, thotë Ali Gjulla.
“SHPRESOJ QË DJALI TË SHËROHET”
E teksa i drejtohesh hyrjes së kishës, në sy na bie Klaudio, vetëm 7 vjeç, i cili bashkë me familjen e tij i ishte drejtuar për herë të parë këtij vendi të shenjtë me vetëm një lutje: që të ketë mundësinë të ecë.
“I kërkoj Zotit dhe Shna Ndout që të kem mundësi të ecë si gjithë të tjerët”, thotë Klaudio.
Ndërsa nëna e tij thotë se kanë dëgjuar për mrekullitë e kësaj kishe, ndaj dhe ka besim që djali i saj invalid do t’i rikthehet normalitetit.
“Kemi dëgjuar shumë për këtë kishë, ndaj dhe erdhëm. Shpresoj që djali, i cili është invalid, t’i rikthehet normalitetit. Për atë po lutem sonte”, thotë nëna e Klaudios.
Për të garantuar mbarëvajtjen e pelegrinazhit, u angazhuan dhjetëra forca Policie, ndërsa pranë ambienteve të kishës kanë qëndruar në gatishmëri autoambulanca dhe personeli mjekësor. Por pavarësisht masave të marra, fluksi i lartë i automjeteve krijoi kaos në lëvizje.
Nata e 12 qershorit u shoqërua me bllokim total të qarkullimit për shumë orë dhe u krijua radhë kilometrike automjetesh nga autostrada deri në qytetin e Laçit. Pelegrinazhi i shenjtë fillon në mes të muajit mars, që është e marta e parë e pelegrinazhit në shenjtoren e Shna Ndout dhe përfundon në 13 qershor, që është edhe festa e këtij shenjti.
Dyndja e njerëzve për t’u bërë pjesë e pelegrinazhit në kishën e Shna Ndout në Laç ka krijuar kaos në lëvizje ne rrugët e qytetit mbrëmjen e së dielës. Si pasojë e dyndjes së njerëzve, lëvizja e mjeteve në rrugën drejt kishës u kufizua nga ana e Policisë Rrugore.
