Çmimet e naftës kanë vijuar tendencën në rënie edhe gjatë sesionit të sotëm, ashtu sikurse analistët paralajmëruan për një korrektim të çmimeve në kahun e poshtëm, pasi që nga dhjetori i vitit të kaluar janë rritur me 13%.
Por, pavarësisht rënies, në tërësi tregu vijon të mbështetet nga ulja e prodhimit dhe kërkesa e fortë.
Nafta “Brent” e Londrës po tregtohet në rreth 69 dollarë për fuçi, duke u tërhequr nga niveli më i lartë prej 70 dollarë të regjistruar më herët gjatë javës.
Ndërsa nafta “Bruto” amerikane po tregtohet në rreth 63.6 dollarë për fuçi.
Analistët shprehen se, tregu do të vijojë të korrektohet, përpara se ti rikthehet sërish fitimeve.
Gjithashtu, çmimet mund të mbështeten edhe nga tensionet gjeopolitike, duke përfshirë situatën në Lindjen e Mesme, sidomos në Katar dhe Irak.
Megjithatë, manaxherët e parave kanë rritur pozicionet e tyre në kontratat “futures” të naftës bruto amerikane, në një nivel rekord.
Organizata e Vendeve Eksportuese të Naftës dhe Rusia po i përmbahen marrëveshjes për të ulur me 1.8 milionë fuçi në ditë, prodhimin e naftës, në mënyrë që të balancohet raporti kërkesë-ofertë.
Marrëveshja do të jetë në fuqi deri në fund të këtij viti.
Por, një faktor që mund të parandalojë rritjen e çmimeve është rritja e prodhimit në Shtetet e Bashkuara të Amerikës mbi 10 milionë fuçi në ditë.
