Kreu i grupit parlamentar të PS-së, Taulant Balla, do të zhvillojë ditën e sotme konsultim për zgjedhjen e Presidentit të ri me kreun e grupit parlamentar “Aleanca për Ndryshim”, Fatmir Mediu. Takimi pritet që të zhvillohet në orën 16:00 të ditë së sotme në Kryesinë e Kuvendit.
Po ditën e sotme ishte parashikuar një takim mes Ballës dhe Enkelejd Alibeaj, në cilësinë e kreut të grupit parlamentar të PD-së. Megjithatë mësohet se ky takim është shtyrë për një ditë tjetër.
Opozita ende nuk ka një qëndrim të unifikuar sa i përket takimit të sotëm. Enkelejd Alibeaj pritet të marrë mendimin e grupit parlamentar që e ka thirrur ditën e sotme për të vijuar negociatat dhe mbajtur një qëndrim.
Ndërsa një ditë më parë Fatmir Mediu tha se kreu i shtetit duhet të jetë një emër me integritet dhe të marr konsensusin e gjerë të partive politike. Nisja formale e procesit do konkretizohet me votimin e raundit të parë më 4 Maj në Kuvend.
