Zëvendëskryeministri, Arben Ahmetaj ka zhvilluar ditën e sotme në Vlorë një takim me biznesmenë dhe prodhues lidhur me situatën e krijuar nga rritja e çmimeve.
Ndër të tjera, Ahmetaj ka lajmëruar se në bashkëpunim me kompani amerikane dhe investitorë strategjikë, do shiheshin mundësitë e ndërtimit të një rafinerie dhe të një termocentrali.
“Vlora e ka kaluar ylberin”– u shpreh Ahmetaj duke shtuar se ishte planifikuar që Vlora dhe Fieri të lidheshin me tubacione gazi me anë të gazsjellësit TAP.
“Kryeministri ka një iniciativë për të parë edhe mundësinë e rafinerisë me disa aktorë ekonomikë të fuqishëm botërorë të cilët janë ose miqtë e aleatëve tanë strategjikë ose vetë aleatët tanë strategjikë. Ju e dini se këtu gati 3-4 kilometra në vijë ajrore do të kemi termocentralin shumë shpejt me një grup kompanish amerikane. Besoj se përveç shtimit të kapacitetit, do ketë edhe një balancim.
Kemi në plan që të lidhim me tubacion gazi Fierin me Vlorën me TAP dhe këtu pretendojmë që të ketë platforma lundruese të gazit, gjë që e kthen gjirin e Vlorës në potencë edhe në një furnizues të rëndësishëm gazi, qoftë për nevojat e brendshme, qoftë për nevojat e TAP-it. Mendoj se na ka rënë shumë kriza këto kohë por qarku i Vlorës e ka kaluar ylberin. Këto troje e kanë kaluar Ylberin. Ka shumë punë për të bërë, por e ka lënë mbrapa e kaluara”– u shpreh Ahmetaj.
