Një i ri indian ka marrë disa oferta ndihme pasi një video e tij duke vrapuar nga puna për në shtëpi u bë virale.
Videoja është xhiruar nga regjisori Vinod Kapri, i cili pa 19-vjeçarin Pradeep Mehra teksa ai kalonte me vrap përpara makinës së tij dhe i tha që mund ta çonte deri në shtëpi.
Por Mehra e refuzoi ofertën, duke thënë se ai vraponte rreth 10 km çdo natë për të mbajtur veten në formë për t’u bashkuar me ushtrinë indiane.
Videoja, e ngarkuar të dielën në mbrëmje, ka më shumë se gjashtë milionë shikime deri më tani.
Mehra po vraponte në shtëpi të shtunën pai mbaroi turnin e tij në një dyqan McDonald’s në qytetin Noida – në periferi të kryeqytetit kombëtar Delhi..
Regjisori tha se i ofroi të riut ta çonte në shtëpi pasi e pa atë të vraponte me një çantë shpine, duke menduar se mund të ishte në telashe.
Ai e xhiroi videon nga makina e tij teksa ngiste ngadalë makinën.
“Do të dashuroheni me këtë fëmijë nëse dëgjoni arsyen e tij”, ka shkruar regjisori teksa ka shpërndarë videon në Twitter.
Mehra, i cili jeton në Noida me vëllain e tij, i tha Kaprit se ai vraponte çdo natë pas punës sepse nuk kishte kohë gjatë ditës për t’u ushtruar.
Kur Kapri i kërkon të hajë darkë me të, Mehra refuzoi, duke thënë se duhej të gatuante ushqim për vete dhe vëllain e tij të madh, i cili gjithashtu punonte turnin e natës.
Kur u pyet pse nuk vraponte në mëngjes, Mehra tha se duhej të zgjohej herët dhe të gatuante para se të nisej për në punë.
Prindërit e tij, thotë ai, ishin kthyer në shtëpi në shtetin verior të Uttarakhand – babai i tij po kujdesej për nënën, e cila ishte e sëmurë.
