Lufta e Rusisë dhe Ukrainës ka hyrë në javën e tretë të saj. Ditën e sotme pritet që në Turqi të zhvillohen bisedime mes Ministrave të Jashtëm të të dy shteteve.
Ministri ukrainas, Dmytro Kuleba, tha përpara takimit me homologun e tij rus, Sergei Lavrov se pritjet e tij ishin “të kufizuara”.
Kjo deklaratë vjen pasi Ukraina akuzoi Rusinë për bombardimin e një spitali për fëmijë, një sulm që Kievi thotë se është një “krim lufte”.
Ukraina thotë se 17 persona u plagosën në sulmin në Mariupol të mërkurën. Që atëherë janë shfaqur pamjet që tregojnë një ndërtesë të shkatërruar.
Bombardimi është dënuar gjerësisht, me Sekretarin e Përgjithshëm të OKB-së, Antonio Guterres që e përshkroi sulmin si “të tmerrshëm” dhe SHBA-të duke akuzuar Rusinë për “përdorim barbar të forcës ushtarake për të ndjekur civilët e pafajshëm”.
Por zëvendësambasadori i Rusisë në OKB, Dmitry Polyanskiy, tha se spitali i bombarduar ishte “shndërruar në një objekt ushtarak nga radikalët [ukrainas]”.
