Ka shkuar në tre numri i personave të arrestuar në lidhje me sekuestrimin e rreth 1 milion eurove në aeroportin e Rinasit. Gjatë ditës së djeshme, përfundoi në pranga një shtetase me origjinë zvicerane, por banuese prej kohësh në Shqipëri.
Në kuadër të operacionit të koduar “Lastra”, forcat e rendit kanë arrestuar shtetasen, Jeniffer Chollet.
Në banesën e zviceranes së arrestuar, sipas policisë së kryeqytetit, u gjetën dhe sekuestruan në cilësinë e provës materiale, lastra dhe produkte të tjera që shërbejnë për përgatitjen e kartëmonedhave të falsifikuara.
Operacioni nisi më 17 shkurt, kur u arrestua fillimisht 53-vjeçari nga Kameruni, Josoue Ngankam, i cili kishte në valixhe shumën e madhe të parave.
Ai kishte udhëtuar nga Parisi drejt Stambollit dhe më pas në drejtim të Rinasit, ku edhe u arrestua. Nga kontrolli i valixhes së kamerunasit me leje qëndrimi franceze u gjetën 279 mijë euro të printuara, të ndara në prerje 500, 200 dhe 100.
Në të njëjtën kohë, u gjetën edhe lastra për prodhimin e eurove false, vlera e të cilave kap shifrën e 1.2 milionë eurove.
Ende nuk dihet nëse bëhet fjalë për një rrjet të organizuar që është përfshirë në këtë aktivitet të paligjshëm, ndërsa për hetuesit, me të rëndësishme konsiderohen lastrat e sekuestruara nga të cilat prodhohen euro.
Përveç autoriteteve shqiptare, nën hetim janë përfshirë edhe ato franceze për të zbuluar grupin për prodhimin e tyre, ndërsa 53-vjeçari nga Kameruni dyshohet të jetë vetëm korrieri.
Pasi u mor në pyetje, Ngankam ka deklaruar se do të takohej me një person tjetër duke e quajtur shkurt “Toni” (Zinedine Nkeh, 45 vjeç, i arrestuar nga Policia të enjten), i cili i kishte dhënë valixhen në Francë dhe do t’ia dorëzonte në Rinas. Ai nuk ka dhënë detaje të tjera për hetuesit, duke mohuar që të ketë pasur dijeni për praninë e parave në valixhe.
