Dënohet me burg përjetë drejtori i shkollës. Ai akuzohet se përdhunoi 13 vajza, disa prej të cilave mbetën shtatzënë.
Një gjykatë indoneziane ka shpallur fajtor dhe ka dënuar me burgim të përjetshëm drejtorin e një shkolle islame me konvikt për përdhunimin e të paktën 13 studenteve gjatë pesë viteve, disa prej të cilave mbetën shtatzënë.
Rasti ka ndodhur në Bandung, Java Perëndimore. Harry Viravan, u deklarua fajtor dhe u kërkoi falje viktimave të tij dhe familjeve të tyre gjatë gjyqit.
Ai akuzohet se ka përdhunuar të paktën 13 nxënëse të moshës, nga 11 deri në 14 vjeç në një shkollë, në dhoma hoteli ose apartamente me qira midis viteve 2016 dhe 2021.
Thuhet se disa vajza mbetën shtatzënë dhe lindën të paktën nëntë foshnja.
Policia e Java perëndimore nisi një hetim dhe më pas arrestoi Viravan majin e kaluar kur prindërit e vajzës raportuan rastin pasi vajza e tyre u kthye në shtëpi gjatë pushimeve dhe pranoi se ajo sapo kishte lindur.
Çështja u bë publike në muajin nëntor, kur nisi procesi gjyqësor.
Një trup gjykues prej tre gjyqtarësh i Gjykatës së Qarkut Bandung e dënoi Viravan për shkelje të Aktit të Mbrojtjes së Fëmijëve dhe Kodit Penal.
Këshilli urdhëroi Ministrinë e Fuqizimit të Grave dhe Mbrojtjes së Fëmijëve të paguajë 331 milionë rupi (20,000 euro) si kompensim për viktimat dhe nga 600 deri në 6,000 dollarë për trajtimin mjekësor dhe psikologjik të secilës vajzë.
Nëntë fëmijë duhet t’i dorëzohen Agjencisë për Mbrojtjen e Fëmijëve dhe Grave derisa viktimat të jenë të gatshme mendërisht për t’u kujdesur për fëmijët e tyre.
Prokurorët kërkuan që Viravan të dënohej me vdekje dhe tredhje kimike.
Gjyqtarët e refuzuan kërkesën për tredhje kimike dhe e dënuan me burgim përjetë.
