Presidenti francez Emmanuel Macron ka thënë se ai mendon se një marrëveshje për të shmangur luftën në shkallë të gjerë në Ukrainë është e mundur dhe se është legjitime që Rusia të ngrejë shqetësimet e saj të sigurisë.
Para bisedimeve në Moskë me presidentin rus Vladimir Putin të hënën, ai bëri thirrje për një “ekuilibër të ri” për të mbrojtur shtetet evropiane dhe për të qetësuar Rusinë.
Ai përsëriti se sovraniteti i Ukrainës nuk ishte për t’u vënë në diskutim. Rusia ka grumbulluar trupa në kufirin e Ukrainës, por mohon planifikimin për të pushtuar.
Moska ka bërë një sërë kërkesash, duke përfshirë që aleanca e mbrojtjes e NATO-s të përjashtojë mundësinë e anëtarësimit të Ukrainës dhe të zvogëlojë praninë e saj ushtarake në Evropën Lindore.
Vendet perëndimore e kanë refuzuar këtë, në vend të kësaj sugjerojnë fusha të tjera të negociatave, për shembull bisedimet për shkurtimin e armëve bërthamore.
Macron i tha gazetës Journal du Dimanche se objektivi i Rusisë nuk ishte “Ukraina, por një sqarim i rregullave… me NATO-n dhe BE-në”.
Ai tha se shpresonte se dialogu i tij me presidentin rus do të ishte i mjaftueshëm për të parandaluar konfliktin ushtarak dhe se ai besonte se zoti Putin do të ishte i hapur për të diskutuar çështje më të gjera.
Macron, i cili gjithashtu foli me presidentin amerikan Joe Biden të dielën, paralajmëroi që të ketë kujdes para pritshmerive se Moska të marrë masa të njëanshme për të de-përshkallëzuar situatën dhe tha se Rusia kishte të drejtë të ngrejë shqetësimet e veta.
Por ai tha se vendosja e dialogut me Rusinë nuk mund të “kalojë përmes dobësimit të asnjë shteti evropian”.
“Ne duhet të mbrojmë vëllezërit tanë evropianë duke propozuar një ekuilibër të ri të aftë për të ruajtur sovranitetin dhe paqen e tyre”, tha ai.
“Kjo duhet bërë duke respektuar Rusinë dhe duke kuptuar traumat bashkëkohore të këtij populli të madh dhe kombit të madh.”
Udhëtimi për në Moskë dhe më pas në kryeqytetin e Ukrainës, Kiev, të nesërmen po bashkërendohet me aleatët gjermanë dhe amerikanë.
