Për kryeministrin Edi Rama, krisja mes demokratëve nuk është diçka që nuk pritej, kjo pasi ai e kishte bërë një parashikim në 2017 që do ketë një përplasje të ashpër mes mbështetësve të Sali Berishës dhe Lulzim Bashës, madje ia kishte thënë Bashës në sytë e të të gjithëve.
Shqiptarja.com risjell në vëmendje një video të Ramës nga foltorja e Kuvendit, nga ku kishte paralajmëruar kreun e PD-së se demokratët e tij ‘do ta rrahin e më pas do nxjerrin në rrugë të madhe’.
“Guri, o guri hajde se po na rrahin! Hajde guri se po na rrahin! Një gjë po ta them i dashur miku im Lulzim ma dëgjo sot këtu përpara të gjithëve. Unë e di si do shkojë kjo punë dhe mbaje mend në fund këta do të rrahin ty se do iu ngordhi gomari dhe do i bien samarit dhe pastaj 7×7=42, 1 kg karrota gjysmë kg presh dhe në fund fare do përfundojë kjo punë që ty do të të nxjerrin këta në rrugë të madhe. Pastaj atje në rrugë të madhe si ta kesh fatin ti bashkë me këta sepse nuk është më rrugë pafund, ka një stacion, stacioni është drejtësia e re. Aty do shikojmë pastaj kush jeni ju dhe kush jemi ne“, ka thënë Rama në 2017 në Kuvend.
