Një spital në Izrael ka thënë se do të nisë testime në stafin shëndetësor për të kuptuar efektin e dozës së katërt të vaksinës kundër koronavirusit.
Rreth 150 pjesëtarë të stafit mjekësor në Spitalin Shiba afër Tel Avivit do të marrin dozën e katërt të vaksinës së prodhuar nga Pfizer/BioNTech.
Secili prej tyre ka marrë dozën e tretë të vaksinës më 20 gusht.
“Në këtë studim ne do të analizojmë efektin e vaksinës së katërt sa u përket antitrupave, parandalimit të sëmundjes dhe analizimit të sigurisë”, ka thënë Gili Regev-Jochai, drejtore e departamentit për sëmundje infektive.
Sipas spitalit, ky është studimi i parë i këtij lloji në botë.
Në kohën e përhapjes së variantit tejet ngjitës të koronavirusit, Omicron, Izraeli ka bërë të ditur se personat mbi moshën 60-vjeçare duhet të marrin dozën e katërt të vaksinës.
Një panel i ekspertëve qeveritarë ka rekomanduar se punëtorët e kujdesit shëndetësor duhet të vaksinohen për të katërtën herë.
Izraeli është përballur me valën e katërt të infektimeve me këtë virus në muajin nëntor.
Megjithatë, së fundmi është rritur numri i personave të infektuar si pasojë e Omicronit.
Ndonëse Izraeli është ndër shtetet që ka zhvilluar më së shpejti fushatën e vaksinimit, vetëm rreth 63 për qind e popullsisë prej 9.3 milionë banorëve kanë marrë të dyja dozat.
Kjo gjë është arsyetuar me faktin se popullsia e Izraelit është relativisht e re dhe një e treta e popullsisë është nën moshën 14-vjeçare.
Për të rritur shkallën e vaksinimit, Izraeli tani vaksinon edhe fëmijët nga mosha pesëvjeçare.
Prej shpërthimit të pandemisë, Izraeli ka regjistruar më shumë se 1.36 milion raste të infektimit me koronavirus.
Sipas të dhënave të Universitetit Johns Hopins, rreth 8,200 persona kanë vdekur me këtë virus në Izrael./REL
