Drejtori i Zyrës për Kosovën në Qeverinë e Serbisë, Petar Petkoviç ka reaguar ashpër ndaj deklaratës së kryeministrit të Kosovës, Albin Kurti se do të votonte pro një referendumi për bashkimin me Shqipërinë.
Petkoviç tha se bashkësia ndërkombëtare duhet të reagojë ndaj këtyre deklaratave sepse heshtja e saj mund të nënkuptojë miratimin dhe zvarritjen e rajonit në konflikte të reja.
“Krijimi i Shqipërisë së madhe do të nënkuptonte destabilizimin fatal të rajonit. Nuk mund të ketë referendum paqësor dhe demokratik për krijimin e Shqipërisë së madhe, sepse ata që do të votonin në atë referendum nuk e kanë në dispozicion Kosovën dhe Metohinë dhe do të kishin një shumicë të njerëzimit që mbështet të drejtën ndërkombëtare”, tha Petkoviç.
Siç kanë raportuar më herët mediat, kryeministri i Kosovës, Albin Kurti ka deklaruar se do të votojë për bashkim me Shqipërinë në të ardhmen, por vetëm nëse një referendum i tillë do të zhvillohet në mënyrë paqësore dhe demokratike.
Një ditë më parë Albin Kurti tha se do të votonte pro një referendumi për bashkimin me Shqipërinë vetëm nëse prezantimi i referendumit vjen në formë demokratike, por ka theksuar se kjo nuk është prioriteti i tij gjatë këtij mandati qeverisës.
