Numërimi mbrapsht ka filluar. 50 konkurente të ardhura nga e gjithë bota që garojnë për kurorën e “The Miss Globe 2021”, pas një turi të gjatë nëpër Shqipërinë turistike, po përgatiten për finalen e madhe.
Për të 18-in vit, “Deliart Association” dhe producenti Petri Bozo vulosin shqip organizimin e një prej eventeve më të rëndësishëm të bukurisë në botë. “The Miss Globe 2021” këtë vit do të ndalë në Tiranë.
Të premten e 5 nëntorit, në sallën e Parkut Olimpik “Feti Borova” në Tiranë, 50 flamuj të botës do të valëviten në një skenë madhështore të ndërtuar mjeshtërisht nga Ilirjana Bozo. 50 bukuroshe do të garojnë për titullin e më të bukurës së Globit në një edicion që i ka parashikuar të gjitha.
Me prezantimin e Arjola Shehut, me artistë të shumë të ftuar në finalen e madhe dhe nën gjykimin e një jurie ndërkombëtare, gara e këtij viti premton të jetë e fortë dhe plot emocione.
Mbrëmja e 5 nëntorit do të jetë finalizimi i një konkurimi që, më shumë se një garë e thjeshtë bukurie është një mision për organizatorët, një iniciativë e përmbushur çdo vit për promovimin e turizmit, kulturës dhe historisë së Shqipërisë. Kjo gjë tashmë është kthyer në traditë.
Prandaj edhe këtë vit, 50 konkurentet, ndërkohë që përgatiteshin për finalen e madhe, kanë shijuar Shqipërinë turistike. Ato kanë vizituar Tiranën, Beratin, Vlorën, Elbasanin, Selenicën etj, kanë shijuar bukuritë natyrore, historike dhe resurset turistike, ndërkohë që gjatë qëndrimit në destinacione të ndryshme turistike janë organizuar edhe minikompeticionet, pjesë e formulës së The Miss Globe si, “The Miss Talent 2021”, “The Miss Globe Head to Head Challenge” etj.
Këto dhe shumë surpriza të tjera do të “rrëfehen” në skenën gjigande të Parkut Olompik në Tiranë, të premten e 5 nëntorit. Spektakli i radhës është gati…
