Vdekja tragjike e moderatores Adela Xhamani në lule të rinisë pas një ataku kardiak, që tronditi botën e medias dhe jo vetëm, la pas dhimbje, lot dhe mijëra mesazhe ngushëlluese për humbjen e madhe.
Në nder të kujtimit, kontributit të 31-vjeçares, ditën e sotme do të mbahen homazhe në qytetin e saj të lindjes, atje ku jetoi dhe punoi për shumë vite. Mësohet se ceremonia e lamtumirës për Xhamanin do të mbahet në orën 12:00, në Kinemanë e qytetit të Kavajës. Më pas gazetarja do të përcillet për në banesën e fundit. Vdekja e Adelës ishte e beftë, duke tronditi jo vetëm ata që e njihnin por edhe ata që e kishin parë përmes ekranit. Ngjarja e rëndë ndodhi orët e para të mëngjesit të djeshëm, në banesën e të ndjerës. Kjo e fundit kishte njoftuar dy miqtë e saj të ngushtë, ndërsa u kishte thënë se nuk ndihej mirë.
Pavarësisht faktit se ajo kishte lajmëruar edhe ambulancën, kanë qenë miqtë e saj ata që e kanë gjetur të pajetë në korridorin e banesës, derën e të cilës ishte munduar me të gjitha forcat ta hapte vet. Edhe pse duket se luftoi deri në pikën e fundit për të jetuar, gazetarja nuk mundi t’ia dilte.
