Dy të rinjtë që shoqëronin Aldi Ramën, kur vrau oficerin e policisë, nën komisar Saimir Hoxhën, do të qëndrojnë në burg pa afat. Gjykata e Apelit në Shkodër la në fuqi vendimin e Gjykatës së shkallës së parë në Lezhë, duke rrëzuar kërkesen e Armando Markut dhe Kristjan Sherrit të cilët kërkonin një masë më të butë. Ndaj dy të rinjeve është ngritur akuza “moskallëzim krimi”, pasi të martën e 28 shtatorit, kur u vra oficeri Saimir Hoxha në Vain, ata ndodheshin në makinë me autorin e krimit, 21-vjeçarin Aldi Rama.
Në momentin e ndalimit të rinjtë kanë deklaruar se kishin shkuar në Vain për të konsumuar hashash bashkë me të ndjerin që sulmoi oficerin e policisë, ndërsa kanë thënë se nuk kishin patur dijeni se ai ishte me masën e sigurisë arrest në shtëpi dhe se mbante arme zjarri me veten.
LEXO EDHE:
Ekzekutoi burrin në mes të tregut në Milot në 2018-n, nëna e 2 fëmijëve dënohet përfundimisht me 9 vite burg nga Apeli i Tiranës
Oficeri i policisë Saimir Hoxha u vra teksa po kthehej nga një aksion antikanabis në Vain. Ai ishte bashkë me dy koleg të tij dhe gjatë kthimit konstatuan një automjet të dyshimet dhe e ndaluan për ta kontrolluar. Armando Marku dhe Kristjan Sherri iu bindën urdhrit të policisë për kontroll, ndërsa Aldi Rama qëlloi për vdekje oficerin Saimir Hoxha, sapo ky i fundit i kërkoj mjetin e identifikimit.
Pas ngjarjes i riu arriti të largohet dhe gjatë operacionit policor për kapjen e tij qëlloi veten me pistolete, duke mbetur i plagosur rëndë dhe një ditë më pas ndërroi jetë në spitalin e Traumës në Tiranë.
Oficeri Saimir Hoxha u shpall ‘Dëshmorë i Atdheut’.
