Ish-presidenti francez, Nicolas Sarkozy, është dënuar me 1 vit burg, pasi u shpall fajtor për financimin ilegal të fushatës së tij elektorale në 2012. Akuza ndaj Sarkozy ishte se ka shpenzuar rreth 22.5 milionë euro – gati dyfishi i shumës maksimale që lejon ligji – për fushatën e tij të rizgjedhjes në 2012, kur humbi përballë Francois Hollande.
Sipas akuzës të cilës i referohet France 24, Sarkozy ishte në dijeni se shpenzimet e fushatës – të cilat janë rreptësisht të kufizuara sipas ligjit francez – po i afroheshin maksimumit të lejuar dhe ai ka injoruar paralajmërimet e kontabilistëve të tij për këtë çështje.
Bashkë me Sarkozy janë dënuar edhe 13 persona të tjerë, të përfshirë në fushatë, të cilët janë gjetur fajtorë për financim të paligjshëm të saj.
Ish-presidenti i Francës do ta apelojë vendimin, por ndërkohë ai po hetohet edhe për akuzan e financimit të fushatës presidenciale të 2007-s nga ish-lideri libian Muamar Gaddafi dhe për ndikim në rastet që lidhen me aktivitetet e tij këshilluese në Rusi.
Sarkozy u tërhoq nga politika aktive në vitin 2017, por ende po luan rol në prapaskenë. Mediat franceze kanë raportuar se ai është i përfshirë në procesin e zgjedhjes së një kandidati konservator përpara zgjedhjeve presidenciale në Francë vitin e ardhshëm.
Është pak a shumë historia e Sali Berishës me Lulzim Bashën.
Vetëm se, siç evidenton sot portali i familjes Berisha, Sarkozy nuk u braktis nga partia e vet pas dënimit, siç ndodhi me Berishën.
Portali i familjes Berisha kërkon që PD dhe Basha të veprojnë njësoj siç veproi partia e Sarkozy, në rast se Berisha dënohet për korrupsion.
“Një ditë pasi gjykata franceze dha vendimin për dënimin e ish-presidentit Nikolas Sarkozy, Partia Republikane ka reaguar me një njoftim për mediat duke shprehur mbështetje të palëkundur për ish-presidentin.
Me anë të një statusi, Partia Republikane e cilëson krenari figurën e Sarkozy dhe shpreh dëshirën për ta pasur sërish atë si President të Francës.
“Pas një vendimi gjyqësor, i cili tronditi shumë nga bashkatdhetarët tanë, ne i dëshmojmë Nicolas Sarkozy mbështetjen tonë, si dhe krenarinë tonë të madhe për ta pasur atë si President të Republikës”.
Por teksa në Francë Partia Republikanë shpreh mbështetjen e palëkundur ndaj Sarkozy, edhe pse ai është dënuar me vendim nga gjykata dhe bazuar në prova, e kundërta ndodh në Shqipëri në Partinë Demokratike”, shkruan portali i familjes Berisha.
Kryetari i PD-së, Lulzim Basha, nuk hezitoi të përjashtonte nga grupi parlamentar liderin historik të së djathtës, Sali Berisha, edhe pse ndaj tij nuk ka asnjë akuzë, provë apo vendim fajësie.
Basha, tentoi distancimin e menjëhershëm të PD-së nga Berisha për shkak të vendimit të DASH për shpalljen “non grata”, edhe pse ky vendim ishte i bazuar në akuzat e ngritura nga rivalët politik dhe OJF-të kundër së djathtës si në Shqipëri po ashtu edhe në SHBA”, shkruan portali i familjes Berisha, që me sa duket e ndiejnë se mund të kenë fatin e Sarkozy dhe kërkojnë mbështetjen e PD-së.
