Roland Stafaj është 35 vjeç dhe vjen nga fshati Kurdari i Burrelit. I riu është bërë sot pjesë e emisionit ‘Me zemër të hapur’ në “News24” ai rrëfen peripecitë që nga fëmijëria, më pas tek shkolla dhe universiteti, e deri tek shpresa për të gjetur një vend pune. Stafaj tregon se në moshën foshnjore një temperaturë e lartë bëri që ai të pësojë paraliza cerebrale spastike që përparoje në formën e lëvizjeve dhe deformimeve të kufizuara për shkak të ngurtësimit të muskujve në krahë dhe këmbë.
Rolandi zhvillimin mendor e kishte normal dhe nuk shfaqi kurrë probleme në jetën e tij, ndërsa zhvillimi fizik ishte më i vonuar. Teksa përlotet, 35-vjeçari na tregon se hapat e parë i ka hedhur në moshën 7-vjecare dhe klasën e pare e ka nisur kur mbushi plot 10 vjeç.
Ka qenë një nxënës shembullor dhe sëmundja nuk e pengoje të ndiqte dhe studimet e larta në Shkodër për degën Gjuhë-Letërsi. Studenti i asaj kohë është përballur me shumë paragjykime nga bashkëmoshatarët e tij, por kjo e bëri më të forte dhe i dha shtysë të mbaronte edhe masterin profesional për mësues.
Ai I kreu studimet në 2011 dhe për një vit bëri praktikën mësimore në shkollën e fshatit ku u dashurua më shumë me profesionin e mësuesit, por mundësinë për të punuar nuk ia dhanë. Rolandi e ka dhënë 5 herë provimin për të fituar vendin e punës dhe ka dal shkëlqyeshëm, por sërish nuk i është dhënë e drejta të punojë duke i kërkuar tashmë licencën e mësimdhënies. Ka trokitur në derën tonë për të realizuar ëndrrën e tij, të bëhet mësues i fshatit ku jeton e do gjuhën shqipe dhe do të përçojë dije tek brezat e rinj.
“Kam kaluar shumë vështirësi. Jam ngritur në këmbë në moshën 7-vjeçare. Torutroja veten, pse nuk isha si gjithë të tjerët. Gjithmonë më kanë paragjykuar. Por unë kam vlerësuar veten. Sot nuk paragjykohem shumë, por më shumë në moshë të vogël. Vazhdova shkollën, dhe sot jam pa punë. Kam kërkuar por askush s’më ka ofruar një punë si mësues. Shpresoj të më gjejnë një vend pune, kam punuar shumë për të arritur deri këtu.”, tha Roland Stafaj, shkruan ‘BalkanWeb’.
