Ministria e Arsimit iu ka dhënë një tjetër mundësi maturantëve për të plotësuar formularin A1/A1Z.
Lajmi bëhet i ditur nga ministrja Evis Kushi, e cila u bën thirrje maturantëve të shfrytëzojnë mundësinë për të kryer aplikimin në datat 8-13 shtator 2021.
“Pas kërkesave të shumta të të rinjve që kanë përfunduar maturën dhe ende nuk kanë plotësuar formularët A1/A1Z, i ftoj të shfrytëzojnë mundësinë për të kryer këtë aplikim në datat 8-13 shtator 2021”, shkruan Kushi.
Plotësimi online i Formularit A1Z do të kryhet në shkollat ku maturantët apo kandidatët kanë kryer arsimin e mesëm të lartë ose në shkollën e përcaktuar nga KMSH-ja e vendbanimit, nëse shkolla e mesme që kanë përfunduar është mbyllur.
Ky aplikim është vetëm për kandidatët që kanë përfunduar të gjitha detyrimet e maturës shtetërore dhe plotësojnë formularin vetëm për aplikim në institucionet e arsimit te lartë.
