Shkodra u trondit nga një ngjarje e rëndë që u zbulua sot. Burrë e grua u gjetën të pajetë në banesën e tyre në lagjen “Ahmet Haxhia” në qytetin e Shkodrës. Fqinjët e çiftit të moshuar u shqetësuan për ta pasi nuk i kishin parë prej tre ditësh. Efektivët e policisë, të sinjalizuar nga fqinjët, shkuan në banesën e çiftit Bandulla, ku i gjetën të vrarë të dy bashkëshortët.
Policia bëri të ditur se dyshohet që 79-vjeçari Fadil Bandulla ka vrarë me automatik bashkëshorten 83-vjeçe Sanijen, e më pas ka vrarë veten. Pranë trupave të pajetë të dy të moshuarve ekspertët e kriminalistikës gjetën edhe një armë automatike, që dyshohet të jetë arma e krimit.
Sipas të dhënave të hetuesve që këqyren vendngjarjen, dyshohet që krimi të ketë ndodhur disa ditë më parë. Grupi hetimor ka pyetur fqinjë të çiftit Bandulla, të cilët kanë thënë se të dielën në mbrëmje kanë dëgjuar krisma por nuk kanë menduar se vinin nga banesa e të moshuarve.
Burimet tregojnë se dy bashkëshortët konfliktoheshin shpesh me njeri tjetri, por arsyeja e vrasjes dhe rrethanat e saj janë ende të paqarta. Dy bashkëshortët e moshuar jetonin vetëm, pasi tre fëmijët e tyre kanë emigruar në Gjermani dhe SHBA.
