Lulzim Basha ka nisur fjalën e tij në Kuvendin Kombëtar duke akuzuar kryeministrin Edi Rama për menaxhimin e pandemisë dhe tërmetit.
Teksa ka kërkuar një minutë heshtje për jetët e humbura nga COVID-19, ai tha se Shqipëria ka bilancin më tragjik.
“Zoti i dhëntë paqe shpirtrave të tyre dhe i ngushëlloftë familjet e tyre.
Sikurse e gjithë Europa e di tashmë, kjo sprovë e vështirë për mbarë njerëzimin shënoi në Shqipëri numrin më të lartë të jetëve të humbura në kontinent në raport me popullsinë.
Një bilanc tragjik që bëhet edhe më pikëllues prej indinjatës që lind vetvetiu ku lotëve dhe dhimbjeve së mijëra familjeve iu kundërvihet buzëqeshja e shtirur e propagandës me të cilën regjimi lau duart për përgjegjësinë e tij.
Kur shqiptarët kishin nevojë iu ofroi vetëm propagandë dhe gjoba “, tha Basha pas 1 minute heshtjeve.
