Vizitat zyrtare të shpeshta kohët e fundit mes zyrtarëve të Kosovës dhe Greqisë kanë ngjallur dyshime në Serbi. Media e njohur “Blic“, parashikon se Greqia mund që të njohë pavarësinë e Kosovës, edhe deri më tani këto zëra nuk janë konfirmuar nga zyrtarë grekë.
“Greqia do të thotë “PO”? Presionet rreth Kosovës po rriten, dhe sinjalet e vogla të dërguara nga Athina, NUK do të pëlqehen në Serbi,”-është titulli i shkrimit të botuar në faqen e parë të shtypit.
Ndërsa në tekst shkruhet se rolin më të rëndësishëm në dialogun midis Beogradit dhe Prishtinës deri më tani e ka luajtur zyrtarisht Bashkimi Evropian (BE), por kjo fuqi tanimë do t’i atribuohet Shteteve të Bashkuara, por edhe “lojtarëve” të tjerë, përfshirë Greqinë.
Por njohja e Kosovës mund të mos jetë me dobi për Greqinë pasi rrezikohet që Serbia të japë “ok” për Qipron, një lëvizje që grekët nuk e duan. Pra e gjitha është luftë diplomatike. Interesat e kujt do të prevalojnë…
