Janë zbuluar të tjera detaje nga dosja hetimore në lidhje me abuzimin me tenderin e uniformave të Policisë në Ministrinë e Brendshme, ku më 10 korrik u arrestuan 9 zyrtarë dhe ish-zyrtarë.
Sipas dosjes hetimore të siguruar nga gazetari i Report Tv, Arsen Rusta, rezulton se Kreu i Policisë së Shtetit ka evidentuar një sërë problematikash me disa elemente të zbatimit të kontratës, konkretisht për sa i përket dorëzimit të mallit, kolaudimit të mallit, sasitë e pritshme, pajisjet e sistemit elektronik të shpërndarjes, mirëmbajtja e sistemit elektronik, si dhe çmimet e ofruara.
Sipas kreut të Policisë së Shtetit, ekziston një mospërputhje midis logjikës së prodhimit dhe çmimit të ofruar
“Ekziston nje mospërputhje midis llogjikes së prodhimit dhe çmimit të ofruar, si ne rastin e Kemisha me menge të gjata kushton me pak se ajo me mëngë të shkurtra, këmisha për meshkuj kushton më shumë se ajo për femra, kostumi I motoçiklistit (me 9 pllakëza mbrojtése) kushton me pak se kostumi i patarulles, xhupi treçerekësh kushton më pak se xhupi i shkurtër, kepuca e dimrit gjysma kushton më shumë se képuca taktike (kambile). Gjithashtu vërehen ofertime te çmimit më të lartë kur sasia e prodhimit është më e madhe, gjë që në industrinë e prodhimit për volume më të mëdha ofrohen çmime më të ulëta dhe anasjellas, duke i bashkelidhur kësaj shkrese tabelën e çmimeve të ofruara në mënyrë jo korrekte nga Njesia e Prokurimit. Prania e këtyre çmimeve, përveç se është risk për cilësinë e produktit, do të ndikojë edhe në llogaritjen e fondit limit në të ardhmen. kjo sepse përvojat e mëparshme ndikojnë në vlerën e kontrates”, thuhet në dosje.
