Vaksina kineze Sinovac është e efektshme në mbrojtjen nga Covid-19 tek të rriturit nën moshën 60-vjecare, por mungojnë disa të dhëna për rrezikun e efekteve të rënda anësore.
Kështu mendojnë ekspertë të pavarur të Organizatës Botërore të Shëndetësisë, të cilët shqyrtuan të dhënat e siguruara nga faza e tretë e testimit klinik të vaksinës në Kinë, Brazil, Indonezi, Turqi dhe Kili.
“Jemi shumë të bindur se dy dozat e vaksinës CoronaVac e ndalojnë Covid-19 tek të rriturit e moshës 18-59 vjeç”, thekson OBSH.
Megjithatë ekspertët citojnë mungesë të të dhënave sa i përket sigurisë dhe mbrojtjes që ofron vaksina tek gratë shtatzëna, personat e moshuar dhe ata me sëmundje bashkëshoqëruese.
Sipas ekspertëve të OBSH-së, nuk ka të dhëna as për efektet e rralla anësore të zbuluara përmes monitorimit të sigurisë, pas autorizimit të vaksinës.
Vaksina e Sinovac është autorizuar në 32 vende, me 260 milionë doza të shpërndara. Mes tyre është Shqipëria, e cila po përdor vaksinën kineze për imunizimin masiv të popullsisë.
OBSH po vlerëson vaksinat kineze për autorizim të mundshëm për përdorim emergjent. Edhe Agjencia Europiane e Barnave ka nisur shqyrtimin e vaksinës se Sinovac.
