Kryeministri Edi Rama i është përgjigjur Partisë Demokratike sa i takon një spoti të kësaj të fundit për fushatën elektorale, ku thuhej se ishte aksident që ai fitoi në 2013-ën.
Gjatë fjalës së tij gjatë një takimi me të rinjtë në Kombinat, Rama tha se nëse PS-ja nuk do të kishte fituar në 2013-ën, vendi do të përfundonte si në 97-ën.
“E keni dëgjuar çfarë thonë? Thonë se; “Para 8 vitesh ndodhi një aksident se fitoi Edi Rama”. Aksident se fitova unë? Pra popullit i iku mendja dhe nuk mbajti më në kurriz Saliun dhe taborrin e krushqve të dasmës së Lulit. Kur ai humbet disa herë siç ka humbur dhe i thotë popullit ai është një aksident, mos u merr me të, nuk ka nxjerrë asnjë mësim. Se ai thotë që populli u tregua budalla.
Sikur populli të mos kishte vepruar në 2013, do të kishte përfunduar njësoj si në 1997. S’kishte më Sudenë dhe Vehbiun por ishte vetë një piramidë. Ndërsa sot jemi në udhëkryq me drejtësinë.”-tha Rama.
