Mitropolia e Korçës ka reaguar pas zjarrit që përfshiu mesditën e sotme Katedralen në mes të qytetit juglindor, teksa po mbahej mesha në ditën e ‘Ujit të bekuar’. Mitropolia sqaron se Katedralja e Korçës nuk ka pësuar asgjë nga tymi dhe flakët.
“Katedralja nuk ka pësuar asgjë. Për shkak të fluksit të besimtarëve gjatë ndezjes së qirinjve kanë marrë flakë mbajtëset e qirinjve. Nuk ka dëme të mëdha, përveç nxirjes së mureve”, bën me dije Mitropolia.
Mesditën e sotme është përfshirë nga flakët Katedralja Ortodokse e Korçës. Nuk dihen shkaqet, por qirinjtë e ndezur nga besimtarët dyshohet se shkaktuan zjarrin aksidentalisht. Tymi dhe flakët pushtuan katedralen pas meshës për ditën e Ujit të Bekuar, ku shumë besimtarë ndezën qirinj. Nga të dhënat e para mësohet se nuk ka dëme në ikona nga zjarri që përfshiu katedralen.
Është dëmtuar vetëm pjesa ku ndizen qirinjtë, pasi zjarrfikësja ka ndërhyrë me shpejtësi duke izoluar flakët që të mos përfshijnë pjesën e ikonave. Pjesa e brendshme e kishës është mbyllur pas rënies së zjarrit, ndërsa gjendja është stabilizuar rreth orës 12:30.
Edhe nga policia e Korçës deklarohet se kanë qenë pikërisht qirinjtë që kanë shkaktuar zjarrin. Në katedrale ishte i pranishëm në mëngjesin e sotëm edhe Presidenti Meta me rastin e ditës së Ujit të Bekuar.
Presidenti Meta u takua në Mitropolinë e Korçes me Imzot Johan Pelushin, ndërsa uroj besimtarët në Ditën e Ujit të Bekuar. “Prania e kryegjyshit botëror të Bektashinjve, tregues i harmonisë sonë të shkëlqyer fetare” tha Meta. Ndërsa Mitropoliti Imzot Johan Pelushi i dhuron Presidentit Meta një ikonë të posaçme të Shën Ilirit
