Një 22-vjeçari u gjet dje i vdekur dhe me hematoma në kokë në Zvërnecit në Vlorë. Ai është identifikuar si 22-vjeçari Sokol Shyrte me origjinë nga Fieri, por banues në Tiranë.
Familja e të ndjerit ka hapur dyert e mortit në fshatin Kurjan te Roskovecit, në banesën që ndodhet rreth 600 m nga qendra e fshatit. Familjarët e viktimës kërkojnë zbardhjen e plotë të ngjarjes, pasi dyshojnë se kemi të bëjmë me një vrasje. Sipas tyre i riu gëzonte shëndet të plotë duke e përjashtuar mundësinë e vdekjes natyrale.
“Ishte një djalë shumë i mirë. Nuk kishte asnjë lloj sëmundjeje. i morën jetën djalit kërkojmë të bëhet drejtësi”, tha një banore e fshatit.
“Kishte shenja në trup, dyshojnë se ua kanë vrarë djalin”, rrëfeu një tjetër fqinj.
Për të ndihmuar hetimet dhe identifikimin e viktimës, policia publikoi ditën e djeshme një foto të tatuazheve në dorën e të ndjerit, dhe i bëri thirrje qytetarëve nëse dikush do të mundej ta identifikonte të kontaktonte me Policinë e Shtetit.
Në përfundim të ekspertizës mjekoligjore, të riut i janë konstatuar disa hematoma në kokë duke ngritur dyshime për dhunë të ushtruar ndaj tij para se të hidhej në det.
