23 qytetarë kanë humbur jetën pasi morën vaksinën e Pfizer në Norvegji. Të gjitha rastet u shënuan te pacientë në shtëpitë e të moshuarve, mbi moshën 80 vjeç. Ethe, të përziera dhe diarre ishin ndër efektet anësore te 13 prej tyre bënë me dije zyrtarët, çka dhe mund të kenë çuar në vdekjen e këtyre personave.
Këto raste u komentuan në emisionin “Shqipëria Live”, ku në një lidhje “Skype” nga Norvegjia ishte mjeku, Ramadan Kovaçi.
“Prej fundit të vitit të kaluar e deri më 14 janar janë bërë rreth 50 mijë vaksinime. Kemi raste 23 humbje jetë që mund të jenë në reaksion të këtij vaksinimit. Çdo humbje jete është dhimbje, por në Norvergji çdo javë humbin jetën 400 persona nëpër azile”, tha mjeku.
I pyetur nëse do të ketë ndryshime në mënyrën e vaksinimit, Kovaçi tha: “Është një parallogaritje, të ndërrohet mënyra e vaksinimit. Ata që janë në fund të jetës të eliminohen nga vaksinimi. Ata që kanë sëmundje të pashërueshme. Nuk ka raste të dëmtimit të shëndetit nga vaksina kur personi është i shëndetshëm. Janë bërë plane të detajuare për punën e vaksinimit. Rezultatet nuk janë shqetësuese”.
Ndërsa kur i thanë se çfarë këshille u jep kolegëve të tij në Shqipëri për mënyrën e vaksinimit, mjeku shqiptar tha se duhet të kenë “shumë kujdes nga sëmundjet shoqëruese që ka personi dhe jo nga mosha”.
Ai shtoi se ka persona në moshë që kanë bërë vaksinën dhe janë shumë mirë, pasi nuk kanë patur ndonjë sëmundje tjetër.
