Partia Demokratike e Presidentit të zgjedhur të SHBA Joe Biden ka fituar kontrollin e Senatit dhe të Kongresit, me dy fitore në shtetin e Xhorxhias.
Raphael Warnock dhe Jon Ossoff mundën respektivisht kandidatët republikanë Kelly Loeffler dhe David Perdue. Demokratët do të kontrollojnë Senatin, Dhomën e Përfaqësuesve dhe Shtëpinë e Bardhë për herë të parë që nga viti 2009. Rreth katër milion votues në Xhorxhia dolën të votojnë në balotazh.
Rezultati është një goditje e rëndë për Presidentin Republikan në ikje Donald Trump.
Zgjedhjet në Xhorxhia u përsëritën sepse asnjë nga kandidatët në zgjedhjet e përgjithshme të nëntorit nuk arriti 50% të nevojshëm për fitore sipas rregullave të shtetit.
Warnock, një pastor Baptist, bëhet senatori i parë me ngjyrë për Xhorxhian dhe anëtari i 11-të me ngjyrë i Senatit në historinë e SHBA.
Çfarë do të thonë këto fitore?
Me rezultatin në Xhorxhia, Demokratët dhe Republikanët tani do të kenë secili nga 50 vende në Senat, dhoma e sipërme e Kongresit.
Sidoqoftë, nënkryetarja Demokratike e ardhshme, Kamala Harris, do të kryesojë Senatin sapo ajo të marrë detyrën dhe do të ketë votën që bën diferencën.
Kjo i jep administratës së Biden një shans më të madh për të arritur agjendën e saj për çështje të tilla si kujdesi shëndetësor dhe ndryshimi i klimës.
Senati gjithashtu ka fuqinë të miratojë ose refuzojë të nominuarit e Z. Biden për postet e kabinetit dhe gjyqësorit.
